Tammurriata all'antica

Figliole 'e Capemonte,
Cu zuóccole e tammórre1,
Aunìmmoce e abballammo,
Ca è festa e 'o tiempo corre.

Ogne ommo cu tre vizie nasce e more,
'o juoco, ll'amicizia e 'o primmo ammore.
Ma, p' 'e maltrattamente ca mme fa,
D' 'o primmo ammore mio mm'aggi' 'a scurdà.

E anduvinate quanno?
E anduvinate quanno?

Quanno ll'aucielle canosceno 'o ggrano,
Quanno na rosa nasce senza spine
E a Piererotta nun ce só' canzone.

Ll'ammore, 'a ccà nu vaso
E 'a llà na rasulata.
Ma po' nu spusalizio
E doppo na figliata.

Tre vizie tene 'a 'nnammurata mia,
'e cchiacchiere, 'a tuletta e 'a gelusia.
E pe' 'sta gelusia, nun c'è che fà,
Lle voglio bene ma ll'aggi' 'a lassà.

E anduvinate quanno?
E anduvinate quanno?

Quanno Natale capita d'austo,
Quanno 'o Vesuvio 'a Napule se sposta
E 'a Grotta Azzurra nun è cchiù celeste.

Vintiquatt'ore, 'e core
Già sbàttono, abballanno.
Chisà nennélla mia
Che spavo sta tiranno.

E cu che sfizio se po' fà ll'ammore,
Quanno ce só' cuntrarie 'e genitore.
Io, quanno mamma dice: "Ll'hê 'a lassà"
Rispongo tomo tomo: "'A lasso, oje mà'".

Ma anduvinate quanno?
Ma anduvinate quanno?