Reten pe Pyhare

Yvytu vevúi asymi mombyrýgui reguâhêva
che rendápe rembyatýva ka'aguy ryakuânguemi
epytána ha ehendu purahéi aropyharéva
ha eraha nde pepo ári mombyry emosarambi.

Kóina che ndéve guarâ amoî aína ko'ápe
opaite mba'e mimígui mbarakápe iñirûrâ
ha aipota ku che symi ha che Chína akângytápe
reguahê repurahéi che Retén Poty ryakuâ.

Nde añoite ku yvytumi che recha ko pyharépe
mamoitépa aime aína che retâ añangareko
guajakan jero'a guýpe ha bolí renondetépe
javorái ky'a vaípe aha'ârô ku pororo.

Agâitéma oikóta hína guyryry hendupyrâva
aroko'êta aína ápe inambígui umi bolí
péina ohóma ipiarikuéra "Tujutî" jeroviahára
peteî ipyrû vevúiva patrullero mitâ'i.

Nde yvytu ore rechama mbovymi ápe roiméva
torypápe oñondive roipyte jai ku'i
ha hi'ári roisu'u yvyra rogue irovéva
ndouvéigui anga oréve ku cigarro parami.

Rehendúpa avei umi loríto iñangekóirô
"Puesto escucha" ypyetépe "creo creo" joaite
oimeva'erâku oñandu patrulléro-pe oje'óivo
mombyrýgui ku ñahendu ka'aguýpe pyhare.

Angete péina ahendu Pilcomayo rembe'ýre
ihu'uvaramoguáicha cañón pu sununu yvyguy
hyapukuénge oguâhê ñaimehápe ka'aguýpe
ha upévante ko hína omboryrýiva ko yvy.

Rehechápa avei pe amoite yvate ojekáva
umi granada luminosa omyendýva umi bolí
okyhyje péicharô hína térâ oime ohêtû nungáva
agâite omoñe'ëne kururu ha piripipi.

Rehendúpa avei camión omba'apóva
ohuâ'i oje'óiva gente oiméne ogueroja
ikatuva'erâ ko orekuéra oñorairôva
ajevérô tesa parápe ipyhare ko'â ava.

Che ra'ârôna sapy'a añandúko pyharéma
ahamíta ahecha che ra'y puesto-pegua
péina amo ára mboypýpe Jasymi iñapysêma
che relój peavei diez y treinta ohechauka.

Rehasátarô yvytu erahami chéve rohóvo
che tupanói che symíme iñangapyhy haguâ
ha emombe'u ichupe che resâinteha aikóvo
Che la Reina pe katu vevuimi eñañuâ.

Letra: Emiliano R. Fernández