Cidules

Un fûc impiât sot i crets e
Sot i teis ch'a nus tegnin di vouli
E spìin a int ch'a nus spiete jù in paîs
A 'nd è lûs, a 'nd è vous, a 'nd è cjants

E pensìn encje as giovines ch'a son da maridâ
E ai vecjuts già da un toc incjadenâts
E pensìn encje a nou, si, a nou biâts vedrans
Cui sa cui ch'a nus tocjarà...

Intant che il soreli al pon di là da mont
Nou finint il butilgjion
Parecjin las vous par vosâ un tic plui fuart
E da cassù par usnot si sintarà

"Ch'a lêti lungje, a lêti, chê achì è pa Marie
E Vigjut che no la lasse âti lâ vie
Ch'a lêti lungje, a lêti e si studi jù tal flum
Chê achì par Marie e par Vigjut!"

"Ch'a lêti lungje, a lêti, chê achì è par Scimon
Che cu la Bete al pâr propit bon
Ch'a lêti lungje, a lêti di là da mont di Cuc
Chê achì pa Bete e il Simonut!"

Intant che la not a si fâs un pêl plui dolce
Giuìn cui amôrs e cul fûc
E vosìn ducj i nons ch'a nus passin pal cjâf
Si, che il paîs nol è tant grant

Plui lungje a va la cidule plui lunc sarà l'Amôr
S'a va curte. Biâts mai lôr!
Fortune encje a di chei ch'a si studarà in paîs
La mê a stente già a partî!

Par usnot vin crodût che l'Amôr vegni detât
Da distance che une stele a fâs colant
Ma vin becât nome un toc di veretât
L'Amôr come cidule a gire, al ven e al va...

"Ch'a lêti lungje, a lêti, chê achì a è un tic par ducj
Nou che vin un amôr tal cûr
Ch'a lêti lungje, a lêti, vus auguri ogni ben
E di vei simpri un biel cîl seren
Ch'a lêti lungje, a lêti, ti auguri ogni ben
E di vei simpri un amôr cun tei"