Dr sidi Abdel Assar vo el Hama

Ja, viellech no zum Abrunde
Äh, eis, wo chli es exotisches isch
Es isch eso, i bi vor öppe anderthalb Jahr in Tunesie i de Ferie gsi
De bini einisch in es Oasestädtli inecho, das het gheisse "El Hamma"
De Name "El Hamma", de het mers dert eso aatah
Und ou di ganzi tunistisch-arabischi Atmosphäre
Und, äh, das hett do mit de Zyt es Lied gäh, wone Art arabischi Ballade isch
"Dr Sidi Abdel Assar vo El Hamma"
Mer cha ned säge, dass es e sehr e ernscht Bitrag isch zu der arabische Frag
Aber, äh, i singes jetzt glich

Dr Sidi Abdel Assar vo El Hamma
Het mal am Morge früeh no im Pyjama
Ir Strass vor dr Moschee zwöi schöni Ouge gseh
Das isch dr Aafang worde vo sim Drama

'S isch d'Tochter gsy vom Mohammed Mustafa
Dr Abdel Assar het nümm chönne schlafa
Bis är bim Mohammed um d'Hand aaghalte hed
Und gseit: "I biete 150 Schaf a"

Dr Mohammed het gantwortet: "Bi Allah
Es fröit mi, dass my Tochter dir het gfalla
Doch wärt isch si, my Seel, 220 Kamel
Und drunder chan i dir sen uf ke Fall la"

Da het dr Abdel Assar gseit: "Oh, Sidi
Uf sone tüüre Handel gang i nid y"
Isch furt, het gly druf scho e billigeri gno
Wo nid so schön isch gsy, drfür e gschydi

Doch wenn es Nacht wird über dr Sahara
Luegt är dr Mond am Himmel häll und klar a
Und truuret hie und da de schöne Ouge na
Und dänkt: "Hätt i doch früecher afa spara"