i han es Zündhölzli azündt

I han es Zündhölzli azündt
Und das het e Flamme gäh
Und i ha für d Zigarette
Welle Füür vom Hölzli näh
Aber z Hölzli isch dervo gspickt
Und ufe Teppich cho
Und es hätt no fasch es Loch i Teppich gäh dervo

Ja, me weiss was cha passiere
We me nid ufpasst mit Füür
Und für d Gluet ar Zigarette
Isch e Teppich doch de z tüür
Und vom Teppich hätt, oh Gruus
Chönne z Füür i z ganze Huus
Und wär weiss, was da nid aues no wär worde drus

S hätt e Brand gäh im Quartier
Und s hätti d Füürwehr müesse cho
Hätti ghornet i de Strasse
Und dr Schluuch vom Wage gno
Und si hätte Wasser gsprützt
Und das hätt de glych nüt gnützt
Und di ganzi Stadt hätt brönnt, es hätt se nüt meh gschützt

Und d Lüt wäre umegsprunge
I dr Angscht um Hab und Guet
Hätte gmeint s heig eine Füür gleit
Hätte d Sturmgwehr gno ir Wuet
Au's hätt brüelet "Wär isch tschuld?"
Z ganze Land in eim Tumult
Dass me gschosse hätt uf d Bundesrät am Rednerpult

D UNO hätt interveniert
Und d UNO-Gägner sofort o
Für ir Schwytz dr Fride z rette
Wäre beid' mit Panzer cho
S hätt sech usdehnt nadinah
Uf Europa, Afrika
S hätt e Wältchrieg gäh und d Mönschheit wär jitz nümme da

I han es Zündhölzli azündt
Und das het e Flamme gäh
Und i ha für d Zigarette
Welle Füür vom Hölzli näh
Aber z Hölzli isch dervo gspickt
Und ufe Teppich cho
Gott sei Dank dass i's vom Teppich wider furt ha gno