Aku Sika, Pt. 1

Aku ei, awisia
M'ade yɛ mmɔborɔ o
Ɛna ne agya awu agya me
Aka me nko ne m'abrabɔ

Ɛmmerɛ bi na ɔpanin bi
Ɔne ne yere na ɛte hɔ
Awoɔ ho yɛɛ den maa wɔn
Akyire yi na Onyame kyɛɛ wɔn ba baa
Ɛna wɔtoo akwadaa yi din sɛ
Aku o, Aku

Amanfoɔ awerɛhosɛm
Ɛmmerɛ a ɔbaatan yi wooeɛ pɛ
Anni nnaanu, anni nnansa
Ɛna ɔwu gyaa akwadaa yi hɔ
Ɛno nti, neɛ ɛbaaeɛ ne sɛ
Papa yi kɔwaree ɔbaa foforɔ
Ɔde Aku hyɛɛ ne nsa sɛ
Ɔntete ne yie mma no

Ɛmmerɛ a Aku tutuu soɔ no
Awerɛhosɛm a ɛtɔ so mmienu
Ɛda bi na papa yi kɔtɔɔ dadefidie
Ɛmu akɛseɛ a yɛfrɛ no Jack no
Ɔbɛsum de too adihɔ sɛ
Anka ɔde rebɛkɔ wiram
Ɔde akɔsum mmoa bi a
Ɛyɛ a ɔbɛsɛe n'afuo

Ɔsumm fidie yi too hɔ no
Aku firi hen o, firi hen o
Akwadaa a ɔnnim biribi ara
Ɔde ne nsa kɔhyɛɛ dadefidie yi mu
Amanfoɔ, obi mmra o!
Obi mmra o, obi mmra o!
Eduruu sɛ wɔtumii yii ne nsa no
Na ne nsa no, ɛso atwa koraa

Ɛyɛɛ saa maa papa yi
Ɔfaa ho dii awerɛhoɔ ara aah
Anni nnaanu, anni nnansa
Ɔno nso wu gyaa aku hɔ
Ɛkaa agyanka yi nko ara
Aka ne nko ne n'abrabɔ

Aku ei, awisia
M'ade yɛ mmɔborɔ o
Ɛna ne agya awu agya me
Aka me nko ne m'abrabɔ

Deɛ ɔbɛdii Aku papa ade yi nso a
Wante n'ani anhwɛ agyanka yi yie
Ɔne ne yere de nhyɛsoɔ
Ɛne ateatea na ɛtetee agyanka yi
Aku nso ampa aba
Ɔde ne nsɛm maa Nyame
Ɛmmerɛ a ɔnyini yɛɛ ababaawa no a
Anokwa, na ne ho ɔ'fɛ yie paa ara

Onyame nso tiee ne mpaebɔ
Ɛda bi, ɔmanhene rehyɛ fa no
Aku faa no ho kɔɔ afahyɛ yi ase
Ɔmanhene ani kɔbɔɔ ne so a
Ɔse ɔbaa yi ara na ɔbɛwaa no
Ɛno nti, ne tiawa twa mu no
Aku kɔdanee ɔmanhene yi yere
Moahunu sɛdeɛ Nyame yɛ N'adeɛ

Ɛno nti, obiara wɔ hɔ a
Fa wo nsɛm ma Nyame
Wosu frɛ no a, Ɔbɛgye wo so
Wobɛyɛ yie ama ɔtamfo ani awu

Aku ei, ɛnsu o
Na Onyame, Ɔnnaaeɛ o (ao!)
Su frɛ No, na Ɔbɛgye wo so
Wobɛyɛ yie ama ɔtamfo ani awu o