Voria vegnar grando

Voria vegnar grando come un platano
Non par criar o par vardar da su in so
Ma par essar bon a saver darghe 'na man
A ci no ghe vien de star drito in piè
Voria averghe la maestosità de un roare
Che i butini i se sconde salendo sora de mi
Essar lisiero e tenaro come una rama de piopa
Che se te casca in testa la par drio schersar

Tegnar vive le storie che gh'è da contar
Averghe sempre la voia de star lì a scoltar
Ringrassiar de la piova e del vento ingiassà
Come el pin de montagna granfati el cresse incurvà

Voria saver d'istà, come de luio un figar
Che a starghe in parte a qualcun ghe vien da vegnar qua
Ma voria anca tegnerme na soca da nogara
Parché se gò rason, saverghe mia molar
Voria averghe el tempo che gà l'olivaro
Ch'el m'ha visto butin, me vardarà anca partir
Essar presente come fa el castagnaro
Che se ghe serve la gente la sa indove sercar

Voria parlar de festa come un sareso in fior
Averghe la convinsiòn de far qualcosa de bòn
Averghe la dolcessa del pero madurà
Ridar de ogni momento solo par essar qua

Come el pin de montagna granfati el cresse incurvà