Onorato delitto 'e passione

Sanghe e storie d'ammore
E l'aria magica d'a primma sera
Onorato delitto 'e passione
Cattura l'anema 'cchiù sincera.
Se dice ca Napule chiagne sempe
Lacreme 'e fuoco, lacreme 'e cenere
Quanno 'nu figlio innocente se perde
E saluta 'a luce, p'abbraccià 'e tenebre

Canto do' mar stanotte, vieni a Poggioreale
Puortame 'e suonne e cientomila cose carnali
Caccia a sta cella, 'o fieto putrido d"a miseria
Puortame addore 'e sciure quanno fa primmavera

Esposito Salvatore,
Secondo genito 'e quattro figli
Originario 'e Casavatore
Ventiquattro anni, bona famiglia.
Mamma commessa, padre operaio
Nun l'hanno fatto maje mancà niente
Pe' devozione faceva 'o teatro
'Nu guaglione cu 'o sole dinto.
Alternava studio e lavoro
Nun le piaceva 'e sta 'nmiezo 'a via
Era l'orgoglio d"e genitori
E vuleva 'bbene a Lucia.

Canto do' mar stanotte, vieni a Poggioreale
Puortame 'e suonne e cientomila cose carnali
Caccia a sta cella,'o fieto putrido d"a miseria
Puortame addore 'e sciure quanno fa primmavera.

'Na spilla argiento 'nmiez"e capille
Vola 'o penziero, se veste 'e ricordo
E supera guardie, muri e cancelle
E 'e strade d"o tiempo ca nun s"a scorda.
"Lucì si 'o mare fore 'a fenesta
Si 'a luce candida 'e ll'uocchie miei
Si 'o sole cavero aropp' 'a tempesta
Si chello ca me fa credere a Dio.

Io ti sarò per sempre vicino
E ti darò 'o meglio ca tengo
Impegno, rispetto, bellezza e poesia
Ogni juorno d"a vita a mo fino a sempe.
E si nun songhe all'altezza 'e stu suonno d'ammore
Fammello mo chistu giuramento
Scigliete a 'n'ato, ma sciglielo 'bbuono
T'adda da pace e no croce e turmiento.

Canto do' mar stanotte, vieni a Poggioreale
Puortame 'e suonne e cientomila cose carnali
Caccia a sta cella, 'o fieto putrido d"a miseria
Puortame addore 'e sciure quanno fa primmavera.

Ma 'a tentazione è comme 'a pioggia d'Aprile
Scenne da 'o cielo e pulezza 'a povere
E fa vedè a tutti addò passano 'e fili
E ca simme fatti 'e carne ca coce.
Fossette in faccia, 'o rispetto d"a gente
E 'na carezza ca fa sta sicuri
Dint' a sta terra addò chi è malamente
Cummanna 'o munno e porta paura,

Lucì 'o guardava cu ll'uocchie lucenti
Comme maje aveva fatto cu Salvatore
E ogni juorno cercava 'e fa ascì 'o mumento
Pe sa fa tuccà addò nunn'arriva 'o sole.
Dinto 'a na machina, into a 'nu parcheggio
Tutto annascuse, pe' nun fa sapè niente
Armata 'e piacere, prurito e curaggio
Addò tutto è 'cchiù scuro e nisciuno te sente.

Canto do' mar stanotte, vieni a Poggioreale
Puortame 'e suonne e cientomila cose carnali
Caccia a sta cella, 'o fieto putrido d"a miseria
Puortame addore 'e sciure quanno fa primmavera.

'E fuoco era l'aria, mumenti 'e passione
Lucì nun disprezzava altre mane fra 'e cosce
Mane assassine spurcate 'e dulore
'E pate innocenti schiattati d'angoscia.

Niente rispetto pe' Salvatore
Niente sapeva 'e stu tradimento
Ma presto 'a notizia 'e st'atto 'e squallore
Facette strada fra 'e lengue d"a gente.
Era 'nmiezo 'a Stagione, 'nu cavero 'e pazzi
Forte era 'a voglia 'e vedè a Lucia
A truvaje annura, sotto 'o palazzo
Abbracciata a 'nu diavolo o a chicchessia.

"No, nunn"è overo, stonghe sunnanno
Chello ca veco è 'na granda buscia"
Ma Lucì ascette, arapenno 'o spurtiello
Dicenno " Totore, nunn'è colpa mia!"
Tu nun ce stive, 'a voglia era forte
Io me sentevo fragile e sola
Picciò stev 'cca, cu 'o figlio d"o boss
Che in amicizia m'abbraccia e cunzola"

Canto do' mar stanotte, vieni a Poggioreale
Puortame 'e suonne e cientomila cose carnali
Caccia a sta cella,'o fieto putrido d"a miseria
Puortame addore 'e sciure quanno fa primmavera.

'A capa se sape, è 'na sfoglia 'e cipolla
E quaccosa scattaje dinto 'a cervella 'e Totore
Avutaje 'e spalle, acalaje 'o cuollo
E forte currette in preda a l'ardore
E quanno penzajeno, quasi ridenno
Ca 'o peso 'e stu gesto era sulo d"o suoje
Totore turnaje, armato 'e curtiello
'E 'a tagliaje 'nganna dicenn "Mo muori!"

'O guappo chiagneva, nun teneva 'o fierro
Mentre Lucia durmeva dinto 'o sangue
"Ommo d'onore" addiventaje agnello
"Ti prego risparmiami, songhe innocente"
Ma 'a scelta era fatta, decisa e cruenta
Trentatrè vase dati all'acciao
Trentatrè buchi, 'e colpi 'e fendente
Comme a l'anne 'e Gesù, o 'a somma d"e guai

Fernesce accussì sta storia malata
Addò nisciuno sarrà vincitore
Addò chi era 'o bbuono sta mo dint"o peccato
E chi era 'o lupo mo è pecurone
Cruda è 'a morale, 'e sta favola amara
Dall'inizio dei tempi unica e sola
Puoje essere giusto, santo o sbagliato
'A fessa, si vo', 'o core arrevota!