Illégal

Ma tennumed ca? am weslem deg wakwaryum
Yeffeɣ‑it yemmut, ma yeqqim yedder wer yennum
Lebḥer aqqa-t deg‑neɣ d agezzum
Aẓuyyet d anessis ittudum
Zzaj n wakwaryum yegga am ca n wesɣun
Ikref‑aneɣ di tudert x tudert ɣer weɣrum
Nxeẓẓer ɣer ujenna, nettwala wi daneɣ‑yessrun
Nxeẓẓer ɣer ujenna, nettwala wi daneɣ‑yettun
Nxeẓẓer ɣer tisi, nettwala wi x‑aneɣ‑yettrun

Yak tamurt d ijt
Lebḥar d ijj
Ajenna d ijj
Ddem d ijj
Aṭṭanen d ijj
Mindi nemsebḍa?!
Di tefraz?!
Deg ikuluren?!
Niɣ di tefray?!

Nhar rumi ugureɣ
Llah yhennik a yemma tejjull ma a dayi-dd‑teffeɣ
Ḍerrɛeɣ‑as alami daneɣ‑ssuren imeṭṭawen
Nhar rumi ugureɣ
Ḍerrɛeɣ i baba mli ufiɣ ataf a deg‑s ffreɣ
Niɣ ksiɣ-t akid‑i s min deg-s yeffer d awalen

Suyt d aytma wer dasen‑ufiɣ mamec
Asen‑sḥinnbeɣ ma ra d nitni a dasen‑ttreɣ awadem

Mli ɣir wer dasen‑t-nniɣ
Ad awḍeɣ xenni dd‑ɣa‑laɣiɣ

Tuffet n tiṭṭawin, tujer tuffet n warruḍ, s waman n lburan
Iyya ma ad sesswent, ancucen yuzɣen, d unixsess n yedmarn
Am tmurt i zi yeggur, iles d teɣmas cedden, am qaɛ iwdan
Nitni qqimen, netta yugur. wer nnin ar mani dd‑ssufeɣen awar
Smeḥ‑ayi a yemma

Wi ttuɣa yennan ad yugur ad yeqḍeɛ layas zi tudert
Zi tmurt mani yeẓẓu asitem d layas, iḥesb‑it d tasɣart
Jjullen ma ad ɣemyen, mani yeẓẓu nnewwac yeffeɣ d tazeggurt

Ijj n uxerres itedden‑as itẓella‑as deg uzellif
Cḥal ɣa‑tekk yemma tettru? cḥal x dayi‑ɣa‑yettu arif
Cḥal ɣa‑yekk baba yettlaɣa‑dd xaf‑i am axmi ɛad kid‑s lliɣ
Cḥal xef dayi‑ɣa‑ttun di ddcar? am axmi wer da imiɣ
Cḥal ɣa kkeɣ i ɣa‑nnameɣ tudert bla tudert!
Ijj n uxarres itedden ittẓalla, axerres n wakuḍ!

Mcubbceɣ aked lemwaj
Ẓwiɣ imeḍlan n lburan
Ilqa-yi-dd yejdi n diha
Ijdi am yejdi aman am waman
Iwdan? D iwdan waha
Xtutleɣ deg yebriden
Lemdeɣ cwayt n wawalen
Xedmeɣ d ismeɣ da d diha
Alu yemma aqqa-yi mliḥ
Alu baba a nferq manda
Alu uma, aqqa‑c qa ad teẓwid
Alu... Aqqa-yi mliḥ
Ittawi-t-idd uqemmum waha

Ugur wer ttfayar, Qa ad tbedd Polizei
Chef, bitte, lassen Sie mich gehen, Ausweis vergessen
Ẓwa deg uzegza, Wer ttmenɣa, Xdem wer tcetka, lmed wer ttessen
Cek d amettluɛ waha, lekwaɣeḍ wer ɣer-k ca, Cekk urid zzeg‑sen
Tusid-dd ssiha, Wer tettursed ca, a dayek ggen min xsen!

Ixess-ic ttesriḥ
Ixess-icek tamɣert
Ixess-icek... Wemkan
Wer dayi-yeksi wemkan

Aqqa ggiɣ recwaɣed, ffɣeɣ zeg upardel
Maca turja ggiɣ ad zzuɣ, Ɣemyent, d iseɣḍel
Urjiɣ ad awḍeɣ ad ḍweɣ, D lesnin-inu i yeḍwin
Ass yeḍfes ass, Assggʷas‑a yecca win
Yemma teffeɣ-dd deg-i, d aẓwar di tenyirt
Ultma tegga lwacun, Wer s-rriɣ taynit
Baba yurjiɣ a t-idd-ksiɣ, Ksin-t wer t-ẓriɣ

Irḍeɣ tubbarkent d lekfen i wul‑inu
Irḍeɣ temlel d lfiqet di llyali‑inu
Ɛniɣ wer ɛniɣ xwiɣ ttakiɣ s walu
Yessulles, yeḥdeq uzir, iḍennaḍ yegnu

Ksiɣ di tittawin
Tiyemmatin, isegman
Irgazen, iḥenjiren
Di lebḥar acemlal
Nitni am necc
Niɣ ujren-ayi
Di min x-asen yekkin
D min x-asen ittekken
Aqqa-yen ɛad din
Ttbuxsuyen s laẓ
D rriḥet n lmewt
Ttrajan wi ɣa yreẓmen
Ca n lmuyyi n laman
Maca legnus n midden

Nnan x-asen
Illegal