M'en Vau

Ai l'arma gelada e la man geinada
E lo gibre estaca mei labras
E mon pitre s'abra sota lei cades
Mei bregas liuras
Gotas de vida
Que degun lei gosta
Siáu ieu l'òdia e la faula
E la fauta que brutla
E la fam sens fin
L'enfant sens filha per li dire tant
Siáu lo temps las que passa lèu
Onte me'n vau degun li va
Detràs lei vaus que lo vent d'ivern
S'i lèva e se lava ma paraula lorda
Me siáu negat dins una dorga seca
Sens ges de gota
Un ange me toca e aluencha la fosca
Mon bof s'amorça escota
Ma lenga s'engana de rota
Siáu la frucha poirida
La lucha perduda
D'aquesta epòca
Lo voide lo gost de la luna
Aluca lo potz e tusta
Siáu la justa lutz escota
Capiti pus de dormir
E piti pus ai pietat pus
Capissi pus de morir
De córre fau rire
Capiti pus
Despassar la manca e
Mon còr se tanca tant

Quand serai mòrt m'enterrarètz
Al pus fons de la cava
AEIOU
Al pus fons de la cava
Quand serai mòrt m'enterrarètz
Al pus fons de la cava
AEIOU
Al pus fons de la cava

Vòli volar sus lo serre
Luenh de la terra
Vòli dançar sus lo monde endormit
Coma un fiu de seda banhada
Pous de l'artèri es lo potz de l'art
Èra lo postulat de l'apòstol
Èri la poussa podra a la boca
Lenga mòrta èstre brut
Letra muta laissar brutlar
L'us alucat
L'a ges de doçor dins mon còr sorn
Siáu sadol me'n vau
Coma l'esmaut romput m'esmauguèt
Cu saup ce que vòu
Aqueu monde sens color?
Perdi l'espèr qu'ai
Perqué non sai
Es per èstre oneste
L'espèr tu l'as
Ieu l'aspre l'ai pres
Quiti lo monde endormit
E quiti tot
A mieja lutz
Caprici tu de mon nis
Quitar de sorrire
Capiti pus
De passar la man e mon còr s'estaca tant

Quand serai mòrt m'enterrarètz
Al pus fons de la cava
AEIOU
Al pus fons de la cava
Quand serai mòrt m'enterrarètz
Al pus fons de la cava
AEIOU
Al pus fons de la cava
Quand serai mòrt m'enterrarètz
Al pus fons de la cava
AEIOU
Al pus fons de la cava

e vaicí
s'auborant dau pivèu de la nuech
l'assèti fresc
per leis oras cremadas
e la ròsa d'estiu que va tombar
ma febre
partirem devers l'adrech d'un lamp
qu'es aquí coma aquò
que se fau enanar

Quand serai mòrt m'enterrarètz
Al pus fons de la cava
AEIOU
Al pus fons de la cava
Quand serai mòrt
Quand serai mòrt

Me'n vau
onte degun li va
Sens ges de camin
Me'n vau
Me'n vau
Me'n vau
Quand sarai mòrt
Enterratz-me
Luenh deis uelhs dau monde brut
Solet
Luenh deis uelhs dau monde brut
Toei meis amics
prendràn de flors passidas
Per lei metre sus ma tomba
Onte vau demorar
Tot solet

V'en faguètz pas
Me'n vau per mielhs tornar
Emai cramar dins lo cèu
Fugir lo monde crudèu
Sarai coma un aucèu
Me'n vau

Me vau jitar d'amont e sautar dins lo ren
Veire la bauca e lei baumas leis avencs
Auçar mitat leis uelhs au luenh
Avans de m'amorçar
Veirai Canaan uei e Sanaa deman
I aurà de fuec dau ponent au levant
Se levarà l'aura finala e sarà l'auba
D'un monde perdut
Sarà vengut lo temps dei Liuatans
E dei demons dau mitan dau monde
Onte me'n vau
degun li va
Siáu la gelosia emai l'amor la mòrt
E l'ambrosia
La racina d'artemisa e la fuelha d'anis
Siáu lo soleu de maganha
Que se'n garça de toei vòstei jutjaments
Que son càrcer s'afondra enfin
Sarai ben lèu mai liure qu'un libre sens tencha
Mai viu qu'un pantais clus
que pus ren empacha
En fach
Ma paraula es ma vida
E la vida es una lucha sens relàmbi
En ansin.