Xmi Ttweḍḍren Isuraf

Tittawin-nneɣ i xef yersa uzillez
Tittawin-nneɣ i xef yersa uzillez
Bberknent meẓyent ẓewɣent s uwezwez
Aqemmum ideḥḥecen isɣellay wer itteffez
Axeyyeq ibedden di tmjja wer inhezz
Asfirnen n uɣil d anuten i ɣa yɣeẓ
D tiḥufar n waẓẓri i dinni ixarreẓ
D tadeḥḥakt x yiles zeg-s ul idduqqeẓ
S wass d meɣridu s llilet d meddez
Amḍel x wenneɣni di tumgint iderrez
Tudert xmi teccat wer deg-neɣ tferrez

Aqqa-yi ɣir ttfafiɣ, aqqa-yi ttemhafiɣ
Ca n webrid yeḍbaɛ wer t-ufiɣ
Tweḍḍer-ayi am dawem tweḍḍer
X tuffut d aseqsi n tudert mayemmi
X llilet d anusi i ufaqi minumi?
Tazzliwin zegga idd-ɣa-tenqar ar tergeb ad teɣli
Nettazzel wer nettekkes la d hah n mezli

Mani-s idd-usiɣ mani-s wer dd-usiɣ
Min da tteggeɣ min dawem ggiɣ?
Rid inu d iḍennaḍ i jjiɣ awarn-ayi
Rid inu d tiwecca yedla wer yettbini
Rid inu ad ariɣ agdud wer yeɣri
Nniɣ-as awi-dd asen-iniɣ
Ufiɣ yeẓẓiẓen wer ittesli

Min teɛnid min wer teɛnid?
Min trezzud ad tilid
Mani ɣa mani
Man abrid i cekk dd-yiwyen
Man abrid cekk ɣa yerren
Ɣir zi seqsa-yi
Ɣir zi siḥel-ayi

Necc d aɣeddumrar
Necc, d uɣeddumrar
Netmeyyel jmiɛ aked tfuct
Ɣer lqibelt n iḥewwasen
I yeggin tagrawla x uct
Zzawect n yemcumen
I xef tesxed duniyt
Taddart n yiẓelmaden
I tekreh trumiyt
Ha iẓelmaḍen ha iyeffusen
Amkan inu mani
Wer t‑ufiɣ jer‑asen

Awal asebḥan ksen-t xaf-i ayetma
Ecc-ayi a cekk cceɣ aya yeqqimen a yemma
Ɣzem imeḍlawen terrem-dd cal neɣra-t di tmezgida
Wer zeg-s neggi ca
Min jjin imezwura bla timmenna d wawal yiẓiḍen?
Itterẓig xmi yettnanna

Aqqa-yi ɛad da?
Aqqa-yi ɛad da, yeqqim deg-i ijj n weẓwar
Ireddu am ca n ugezzim yeɣza yuff yeswa
Am uma-nni wer yiwiḍen ad yeẓwa
Am weltma-nni i kerfen qbel ma a tenwa

Ksiɣ deg uḍar-inu ad telɛeɣ wer ssineɣ mani
Ad ggureɣ ɣer uneggar n dduniyt
Ad ssyuriɣ s uɣimi
Lastima x tmurt i wer ɣeri-i
Tammur-nni zzenzeɣ wer dayi-tesɣi
Ad ggureɣ ad ggureɣ ad neɛɛleɣ deg ucetki
Tammurt urid d cal, tammurt d temẓi
Temẓi-nni jjiɣ, ufiɣ-tt wer telli