Scétate! È gghiùorno

('Paesana')

'N c'era 'na vòta -uè nì- Minicuccio
Cco' doie crape appriesso a lu ciuccio
Chiamava a Peppo, facìa lo treno
Ma non pigliava paglia ppe' fieno
Ma non pigliava paglia ppe' fieno

E 'n c'era puri masto Pascale
Facìa li bbuchi a lo matrale
"Certi iuorni proprio" - ricìa - "BOH!"
E lo dicìa tanno ppe' mo'

'N c'era 'na vòta Tresa r'Allicchio
Cco' accette e fàuci inta lo sicchio
Facìa l'uocchio, criscìa la gente
E stìano bbòne, bastava niente
E stìano bbòne, bastava niente

Era poeta mio zio Crescenzio
Terra e fatìa, viersi e silenzio
Facìa lo 'riàvolo' a lo treato
No' r'era paro cchiù nisciun ato

Scétate! È gghiùorno, ca è ggàoto lo sole
La strata è longa e de poche parole
Lo tiempo passa e sana li punti
A chi no' scangia li fatti e li cunti
A chi no' scangia li fatti e li cunti

Facìa mmiraculi Peppo re Tata
Vino ra l'acqua già 'ntrovalata
Nozze di Canaan! Viecchio alchimista
Vattiava cchiù dde Giovanni Battista
Vattiava cchiù dde Giovanni Battista

E Pantaleo, masto scarparo
Re ogni cunto facìa 'no paro
"A la via re fore"-"Chiove!"-"Te fai a gghì 'n culo."
'Na botta a Di Alario, ca rire ra sulo

E non parlamo re Pacchianella
R'avìano rato 'na pomatella
'Na crapa sterpa facìa assi' prena
Lo terre pronto... la luna chiena
Lo terre pronto... la luna chiena

E cómpa Carmino, detto re Fuoco
Chiecava fierri, come ppe' gghiuoco
Prefetto attore, capo trappetaro
Cuglìa l'uoglio e ghinghìa lo staro

Scétate! È gghiùorno, ca l'uva è matura
Cche pèngole r'oro, cche bella natura
Pisata revodde e caccia lo vino
Cche adduri, cche suoni, cche Santo Martino
Cche adduri, cche suoni, cche Santo Martino

'N c'era Nicola detto 'Mittiamo'
Cco' bbino e canti lo ricordamo
'Maria, mamma nosta' e 'Calabresella'
"Cchiò cchiò"... 'nu surchio... e 'La villanella'
"Cchiò cchiò"... 'nu surchio... e 'La villanella'

E 'n c'era Angilo re lo Paparieddo...
Ìa alluccanno ppe' ogni stirieddo:
"Sintìti lo banno, ca Peppo è arrivato,
Spaselle re pesce re Chiuppi ha portato!"

Pittore r'aerei Giovanni Nese
Gran coldiretto e manco le spese
Cavanna portiere, veloce scappava
Ppe' corre appriesso a chi lo friscava.
Ppe' corre appriesso a chi lo friscava.

Cco' 'na chitarra vecchia e stravecchia
'N cielo ca sona, 'nc'è zi' Anellecchia
"Mannascia ccà, mannascia ddà..."
E la Maronna non sape cche ffa'

Scétate! È gghiùorno, cuccipannedda
Caccia lu ciuccio e mitti la sedda
Inta 'na sporta lo ppane e l'arciola,
Stipa inta l'ata 'stu suonno c'abbola
Stipa inta l'ata 'stu suonno c'abbola

Zì Peppo Scèoza, masto Rosario
Stocco, Paranza, Sciarpa, zi' Mario
Zi'Ntonio re 'o Valli, Marchese, Peshcone
Setticapozzole, e Gino e Copone

Pietro r'Austo, Rosario, Brutino
Zi' Capitano, Cumincio, Pierino
E Pulitano, lo Cocco, Marcuccio
Ceppone, lu Pippo, lo Puppo e zi' Luccio

Stutacannéle e Culo re Addina
Sartania, Remonio, Tirafumo e zia 'Ntina
Aitano, lo Bosso e Tuozzo re Pane
Pestefaro, Conte, Ceccella e lo cane

Perbacco e Bévere, cómpa Sessanta
Lo Papa, lo Sìnnico e quanta e quanta
Re bella gente ca non c'è cchiù
So' ancora vivi, come si' tu

Scétate! È gghiùorno, te uarda la gente
Re 'sto paese... passato e presente
Chi vai e chi vene e resta la storia
Si canti 'sti cunti e ne passi memoria
Si canti 'sti cunti e ne passi memoria