Na Guillelma, manz cavaliers arrage

Lafranc -
Na Guillelma, manz cavaliers arrage
Annanz de nuoitz, per mal temps que fazia
Si plaingnian d'alberc en lor langaje
Auziron dui bar que per drudaria
Se·n anarain vers lurs donnas non len
L'uns se·n tornet per servir cella gen
L'autres anet vers sa domna corren
Cals d'aquels dos fos mielz so quel taingnia?

Guillelma -
Amic Lafrancs, mielz complit son viatge
Al meu semblan, cel que tenc vaç s'amia
E l'autres fes Ben, mas son fin corratge
Non pot saber tan ben sidonz a tria
Con cel que vi devam sos oillz prezen
C'atendut l'ac sos cavaliers conven
E val trop mais qui so que dis atan
Que qui en als son corrage cambia

Lafranc -
Domna, sius platz, tot can fes d'agrage
Lo cavalliers, que per sa gaillardia
Gardels l'autres de mort e de damnatge
Li moc d'amors, que ges de cortezia
Non ha nuls homs si d'amor nol deisen
Per que sidonz deu grazir per un cen
Car desliuret, per s'amor, de turmen
Manz cavaliers, que si vist en l'avia

Guillelma -
Lafrancs, jomais non rasones musatge
Tan gran con fes aquel que tenc savia
Que, sapiatz ben, mout i fes gran outratge
Pos bels servirs tan de cor li movia
Car non servi sidonz premeiramen
Et agran grat de leis e iauzimen
Pois, per s'amor, pogra servir soven
Emanz bos luocs, que faillir no·i podia

Lafranc -
Domna, perdon vos quier s'ieu dic follatge
Cuei mais vei so que tot o mescrezia
Que non vos plai cautre pelegrinatge
Fassan li drutz, mas vos tota via
Perque cavals, c'om voill que bïort gen
Dev'om menar ab mesurap a sen
E car lur drutz cochatz tan malamen
Lur faill poders, don vos sobra feunia

Guillelma -
Ancar vos dic que son malvatz usatge
Degra laissar on aquel mezeis dia
Li cavalier, pos domna d'aut paratge
Bella e pros dec aver en baillia
Qen so alberc servion largamen
Ja el no·i fos mas chanson rason pren
Car sap que ja tan de requezemen
Cal majors os poders li failliria

Lafranc -
Domna, poder ai eu et ardimen
Non contra vos, que vences en jazen
Per queu fui fols car ab vos pris conten
Mas vencutz voill que m'aiatz con que sia

Guillelma -
Lafranc, aitan vos autrei eus consen
Que tan mi sent de cor e d'ardimen
C'ab aital geing con domna si defen
Mi defendrai ai plus ardit quei sia