Usem Aug vo dem Zyklon

Wenni im Herbst de schwäri Nebel
D Sunne nümme lot lo schiine
Wird im Stammbaum bi dim Foti
Die zwoit Johreszahl erschiene

Muetter Muetter was isch morn
Instabili Ruhe nachem Sturm
Muetter Muetter nimm de Splitter
Nimm ne usem Aug vo dem Zyklon

Sisch en Aafang und es Endi
I luege ufe zu de Sterne
Und die allerschönschti Bluse
Hanget hütt amene Bügel

Sie hanget so dass mer sie gsänd
A dem Schlüssel vo dem Schrank
Wo alli Chleider Etikette
Mit dim Name druffe händ

Dunde i de Wandelhalle
Wo mer nie me werde zäme sii
Sitzt de Saucheib a de Bar
Und ladt mi
Ufnes himmutruurigs Gfüehl iii

Und was er seit macht alles schlimmer
Er seig ufe zu der is Zimmer
Und hett di mitemene Geschenk verfühert
Und sini Liebi seig für immer

Und dis letschte Hömdli hanget
Es isch s wiisse ohni Täsche
Es isch s wiisse unbefleckte
Und au das
Wo mer nie werdet wäsche

Alles singt und alles schwingt
Und denn goht en Türe zue
Alles starr und alles still
Schweb devo i aller Ruhe

Wenni im Herbst de schwäri Nebel
D Sunne nümme lot lo schiine
Wird im Stammbaum bi dim Foti
Die zwoit Johreszahl erschiene