Canzoni addinucchiata

L'armuzza di me matri mi lassàu
sgravata dô piccatu da me carni
mancu 'u vattìu ci potti e m'arristàu
'a curpa ca purtava supra ê spađđi

Ancunicchiàta sutta la currìa
'a peđđi m'allisciàunu a tumbulati
Santa Maria s'havìa scurdatu 'i mìa
sutta ê patèđđi cìciri caliati

Assammaràva c'aveva deci anni,
malu mistèri ha statu 'a lavannàra
beđđi dinocchi ci lassàj ê petri
'i manu s'annïàru 'nta ciumàra

Finíu la guerra e s'accapàu l'amuri
ô friddu era e 'u friddu sû purtàu
ju m'anciccàva 'nterra pi prïàri
ma menzu 'a nivi 'a nivi sû curcàu...

Doppu vint'anni ancora a dinucchiùni
calàta p'arricògghiri 'i frastuchi
calàva 'u suli e ju non m'addrizzava
'u jarmu dô camperi mi vuleva

Carrabbinera trasi 'a morti 'n casa
Santa Maria s'arrïurdàu di mìa
cunortu fu me matri ciaurùsa
nun lassu nenti e nuđđu sdillanìa

Dintra ô tabútu ô scuru 'un haju abbèntu
nun haju piacìri a stari stinnicchiata
è 'a prima vota e cu mi l'hav'a diri
calàtimi 'nta fossa addinucchiàta,
è 'a prima vota e cu mi l'hav'a diri
calàtimi nta fossa addinucchiàata...