Chätschgummi

elisabeth, i streue rose uf di wäg
's si ufe tag 45 jahr här
sitdäm i z erscht mal
richtig küsst bi worde

ig kugelrund mit summersprosse
u du schmal wie nes reh
aber gägesätz zieh sich halt
ab und zue us u a
we si's müesse ha

elisabeth, i gloubes gäng no nid
i ha doch denn nume gfragt
hätsch ächt
e chätschgummi für mi
tuet mir leid hesch gseit
ha nume dä i mim muul
u wed ne unbedingt muesch ha
när muesch dir ne halt einfach näh
i ha dir d helfti gla
du lachsch mi so fräch a
dene zeige mer's no, hesch gseit
sit däm vermissen i di so

mir si beidi no bluetjung gsi
mir hei beidi no nüt gwüsst
und alli hei blöd gluegt
i däm gschissne Klagefurt

bisch myni erschti liebi gsy
hei nume briefli gschribe, händli ghalte
und üs aagluegt, stundelang

elisabeth, schön, dass es di git
di hei si is lyceum gsteckt
u mi i ds heim nach Klagefurt
nume furt vo dir

i ha dys bild mit em chätschi
i ds poesiealbum kläbt
i ha grännet wi ne schlosshund
i ha bättet u glych wytergläbt

elisabeth, alti liebi roschtet nid
ds glyche fräche lache
die glychen ouge
ds glyche strubelhaar

s'het paar silberfäde dinn
aber d zahnschpange isch furt
fählt nume no der chätschgummi
zum grosse glück – hin u zrügg

elisabeth, i streue rosen uf di wäg
's sy ufe tag 45 jahr här
sitdäm i z'erscht mal richtig küsst bi worde

elisabeth, i streue rosen uf di wäg ...