Fallit

Det hår ræent i næt*, så græjst* er sikkert grovve lidt
Men no skjænner soel ijan* å bager kuent* te høsten.
Hør som bøen de leger, i da blyvver-æ hjæt*
Heldigvis det eej i-mæel* lufter lidt å øesten*.
Veeje* det står åbent, men gardint er trokken for
Det pustes op som en ballon me' rye blomster på.
Og hør som fovlen* de synger.

Dar er steel her eej i tjykkent*, vi ser intj æ uer*
Det er lissom vi intj tør å sæej det dar ska sajjes*.
For dar leejer* æ styk papir her på vor tjykken-buer
Vi kan intj kom uen om-æ, hvant så end det væjjes*.
Dar stoer æ tal dar på så stuet*, ja det ka vaegt* blyev støer
Å eejen oet daev*, det ka aldrig la sæ jøer*.
Hør som fovlen de synger.

Dar er kommen noe i dit blik, a intj forstoer
Intj for det a tror, at do vil bebrejd mæ noe.
At det er såntj som det er, det ka intj jøer for
A hår ræent* å knokkelt, så a snået er tossi oe*.
Og vi' jo intj de jannest*, det skier snået for hvaraen
Men båer vi intj var hilt håltj op å snaek me' hinaen.
Hør som fovlen de synger.

Det er læeng seen, vi ku sitj hvordant det her vil go
Men maj hår val gon å håbt det sku blyv ajjer tijjer*.
At vi såntj sku gå fallit, det var intj te å troev
Men me' det her brøv da ka a sitj det goer intj mier.
Hvæen* ska vi fløt hen, å hva ska vi sæj te bøen?
Å hva me' havvi* som do lieg hår lavve så skøen?
Hør som fovlen de synger.

A tøgs åelti vi hår døvve mø*, å mångelt pæeng
Men vi pleer da å betåel hvaer en kroen vi skylder.
A tror åel dæem vi tjejer*, de hår væst-æ læeng
For de ujgoer åes, somom vi hae hat fnat å bylder.
Oh, tur'a båer ji din håej* æ klæem, båer jet*
Så hae vi intj var slæt så janner, om å gå fallit.
Hør som fovlen de synger.

Det hår ræent i næt, så græjst er sikkert grovve lidt
Men no skjænner soel ijan å bager kuent te høsten.
Hør som bøen de leger, i da blyvver-æ hjæt
Heldigvis det eej i-mæel lufter lidt å øesten.
Veeje det står åbent, men gardint er trokken for
Det pustes op som en ballon me' rye blomster på.
Og hør som fovlen de synger.

*) Ræent i næt = regnet i nat
*) Græjst = græsset
*) Ijan = igen
*) Kuent = kornet
*) Hjæt = hedt
*) Eej i-mæel = ind imellem
*) Å øesten = fra øst
*) Veeje = vinduet
*) Fovlen = fuglene
*) Tjykkent = køkkenet
*) Uer = ord
*) Å sæej det dar ska sajjes = og sige det der skal siges
*) Leejer = ligger
*) Uen om-æ = uden om det
*) Væjjes = vendes
*) Stuet = stort
*) Vaegt = dårligt
*) Å eejen oet daev = og inden otte dage
*) Jøer = gøre
*) Ræent = regnet
*) Tossi oe = tosset af det
*) Jannest = de eneste
*) Ajjer tijjer = andre tider
*) Hvæen = hvor
*) Havvi = haven
*) A tøgs åelti vi hår døvve mø = jeg synes altid vi har døjet meget
*) Tjejer = kender
*) Håej = hånd
*) Båer jet = bare ét