Verby isch nit verby

Verby isch nit verby
U aus, wo mau isch gsy
Aues, aues isch no da
Wo ni i mir inn ha

U nüt isch wägg, u i weiss
Es chunnt mir aues wieder z'Sinn
U s'brönnt u lüchtet heiss
E roti Sunne i mir inn

Am sächsi steit me uuf, am siebni git es Zmorge
U am zwöufi Zmittag u am sächsi Znacht
Me macht im Tau aus haargenau eso
Wüll me's im Tau scho gäng genau eso het gmacht

Me het im Dorf denn o no mitenanger gredt
U zwar eso, dass me enang im Dorf versteit
U d'Lüt hei "Grüessech, so, wie geit's, wie steit's?"
"Aus Guete gäng" u när "Uf Wiederluege" gseit

Am Sunntig d'Giele i de schwäre, brune Sunntigsschue
U d'Meitschi im ne liechte, häue Sunntigschleid
U d'Manne, die hei gruusegi dicki Stümpe groukt
U d'Froue Hüet mit elegante Netzli treit

S'het Väter gä, wo d'Ching verprüglet hei
U au ir Nachberschaft hei's gseh, hei's ghört
U niemer hätt wäg dessi reklamiert, ne nei
Das het haut äbe denn no zur Erziehig ghört

Derfür hei sie eim när i d'Sunntigsschuel
So zure sture, graue, aute Tante gschickt
U we me dert i ds Kässeli es Zwänzgerli het iche gla
Het ds Negerbuebli mit em Chöpfli gnickt

Die meischte Lehrer hie sy sträng, aber no guet
U nume die ir Ungerschueu isch chli ne Chue
Der Tschugger isch im FC u ne zfriedne Siech
Dä luegt, dass Ornig isch im Dorf u ab de Zähne Rue

Der Chef vor Bank isch Oberscht u befiehlt
Dä preicht im Tau genau der lut u richtig Ton
Und är seit: "Manne, üse Find, dä chunnt o hie im Tau vo linggs
U die sy zaut vor Sowjetunion"

I ds Militär isch jetz e jede hie
U wär dergäge isch, dä spinnt u chunnt i d'Chischte
U wär o nume villecht schwul isch i däm Land
Isch e Vagant u landet bi der Polizei uf ere Lischte

Regiert im Dorf het BGB
U gschosse, gschuttet, turnet, gjasset, gjodlet, gsoffe hei fasch au
U we der SCB isch cho, de hei die Städter aube gseit
"So hü föt aa, die Bure müesse när i Stau"

Im Dorf hei d'Froue denn nüt z'säge gha
Hei putzt u gkochet, gartnet, gwöschet, glettet, glismet, gflickt
Hei d'Goofe agleit, Teppich klopfet, d'Wösch ufghäicht
U sich i ihres Froueläbe gschickt

Mi Muetter, die isch angersch gsy
I gseh se gross u schön ir Chuchi, wie sie vor mir steit
U ungereinisch ghöri ihri Stimm, u ghöre
Wie sie jetz vo wyt, wyt obe ache zue mir seit

"Martin, gang, hou es Brot bim Beck, u gäu, chumm sofort wieder hei
Lue hie isch ds Gäut, u gäu, tue ds Brot de ou i d'Täsche"
U wenn i a se däiche, däiche ni
O i bi einisch so wie sie, es chlises Hüüfli Äsche

Verby isch nit verby
U aus, wo mau isch gsy
Aues, aues isch no da
Wo ni i mir inn ha

U nüt isch wägg u i weiss
Es chunnt mir aues wieder z'Sinn
U s'brönnt u lüchtet heiss
E roti Sunne i mir inn

Die gueti, auti Zyt
Hör uuf, es git se nit
I luege d'Wäut, wie sie isch gsy
Wo ni e Bueb im Dorf bi gsy