Stucky

Stucky xe un palasson
in fondo a la Giudeca
coi muri a picolon
che par che no'l resista
vardandolo cussì
te fa na maravegia
ch'el possa esser sta
el pan de 'na famegia.
El g'ha dà da lavorar
a tanta e tanta gente
che se g'ha consumà
e no xe restà niente.
'Na rabia che te sera
la gola co ti ricordi
speranze e paure
in 'sti bruti momenti.
Quando che i lo g'ha fato
un sogno, 'na speransa
barconi che rivava
col gran de l'abondansa
lavoro, tanto lavoro
la paga xe al sicuro
te masena 'sto mulin
'na farina che xe oro.
Un oro mal goduo
dentro a 'sti casarmoni
col gran spacà ne l'aria
che entra nei polmoni.
Bianchi semo restai
più bianchi de la farina
quando che i te g'ha dito
La fine xe vissina.
No ti volevi creder
né ti, né tuti 'st'altri
dentro ve se serai
sperando in tuti i santi
più de sinquanta giorni
vegno matina e sera
te porto da cambiar
e l'aria de la to famegia.
Po un giorno quei barconi
fermi e intristii
s'ha impegnio de novo
in aqua i xe tornai
ma sora no ghe gera
più i sachi de farina
ma tuti i operai
ognun co la so famegia.
E tanta, tanta zente
de la riva ne sigava
Coragio fioi ste duri
xe vostra la vitoria.
Speranze ancora e dopo
a uno a uno tuti
se g'ha trovà un lavoro
e i g'ha serà 'sto Stucky.
Adesso tutti i giorni
ti va fin a Marghera
ti te g'ha abituà
ma la xe stada dura
e duro anca par mi
vederte sempre manco
e averte qua vissin
sempre più stanco.