Grammophon

Weis no genau wi mir dert ghocket si, mitemene Block Papier
Hei Schiffli versänkt mit Blofi u chli Strategie
äs Gobi Buech aus Ungerlag, Hobbies heimer 100 gha
Immer gwüsst was mache, aues guet, aues wunderbar

S het gfägt mittem Marco Polo Pulli und em Stirnband
Lücht gäub, lücht grün, pink eigentlech hirnchrank
En erschte Fau vo BSE hei mir im Fernseh gse
U när Beschwärdebriefe gschickt mit dr PTT

A propos Fernseh, hei nume zwe dütschi Sänder gha
U mängisch no ne dritte, abhängig vo dr Wätterlag
Hei bitti bätti gmachtt, das mir chöie glotze bis Mitternacht
När isch fertig gsi, nume no Teschtbiud - nid intressant

D Madonna isch jung gsi dr Jackson no schwarz
Hei no Mondo Punkt gsammlet, das dr ganz Summer lang
Und lue, hei o mängisch usem Nüüt afa schluchtze
Het stundelang duuret wine 9-Nadu-Drucker

U d'Mueter het tröschtet, dr Pere het sech ufgregt
U niemer het am Psychi aglütte u gfragt wis usgseht
Hei Mixtapes gmacht mit de Hits usem Radio
U wöu die Lieder meischtens nume einisch pro Tag si cho

Simer stundelang vorem Tapedeck verwilet
Sone Seich, sisch di haubi Freizit i das Tape ine
Heis när kopiert und fin süberlech beschriftet
1984, Mixtape Nummer 17

Läck si mer aut worde – au ds Züg wo mir erläbt hei
No ohni Internet – ohni Blackberry
Doch mir dänke gärn zrügg – mit Commodore Zit vertribe
Si Fän gsi vo Michael J. Fox und Zitmaschine
Läck si mer aut worde
Vo üsne Heude vo früecher si scho fasch au gschtorbe
Mir wüsse hüt isch aues digitau – aber mir tigge no analog
U lose-n-üsi Schibe-n-immer no uf Grammophon

I gse-n-is no genau – i dene Jeans – dene verwäschne
Und dä Fähli uf dr Schutäsche
Derzue e lüüchtgäube Playcrew Pulli vom ABM
Und e Piuzfriise – hüt verträits mir fasch d Magewäng

Aber di Zit – di Zit vo Michael Knight u KITT
Vo Miami Vice und vom MacGyver u sine Tricks
Di Zit wo mir no Züg säuber hei gflickt
I ha se gliebt – mir hei nid googlet, mir hei diskutiert

Si beidruckt gsi we mir e Fax hei gschickt
Si nid drus cho, wi – we mir im Math hei gspickt
Und ab und zue hei mir e Chlapf kassiert
U niemer het sech ufgregt – ds isch Standart gsi – yup

Hei no keni Handys gha – drfür es Telefon
Mit Dräischibe und Block u Schriber näbedra
Faus mer öpis hei müesse notiere zum usrichte
Ufem Tisch hei sech d Notizzettle ufgschichtet

Mit Telefonnummere hei mir is fasch wund gschribe
Wöu mir hei üsi Agenda immer umgschribe
Gfötelet hei mir nume säute und sparsam
Hei Sunntigschleider parat gha und aus in bar zaut

Twix isch no Raider gsi – Kent no Barclay
Hei mit Blofis Kassette gflickt – dsch aus normau gsi
Bärn isch scho denn mini Stadt gsi – nume ds
YB isch no Meister worde-n-im 86i

Läck si mer aut worde – au ds Züg wo mir erläbt hei
No ohni Internet – ohni Blackberry
Doch mir dänke gärn zrügg – mit Commodore Zit vertribe
Si Fän gsi vo Michael J. Fox und Zitmaschine
Läck si mer aut worde
Vo üsne Heude vo früecher si scho fasch au gschtorbe
Mir wüsse hüt isch aues digitau – aber mir tigge no analog
U lose-n-üsi Schibe-n-immer no uf Grammophon