Zena

L'êa za in pö
Che no pasâvo in sciâ ciassa
A Canpomòn de matin
Gh'é quel'ödô bon de figassa
A gente ch'a passa
A s'aferma a acatâ
A sciòrte, a mangia
A va in zu a travagiâ
Ti piggi a machina ò o scooter
O treno ò l'autobus
Gh'é senpre pin de zoêni
A Pontedeximo in staçion
Gh'é senpre quello pelandron
Che pöi o dòrme in sci banchi
Ghe n'é tanti sensa lòu
Che fadigan a anâ avanti
Figeu, semmo stanchi
Palanche no ghe n'é chi
Gh'é da fâ anche i conti
Con l'aomento de l'AMT
De tasce semmo pin
No semmo goæi avâri
De vòtte in pö orsci
De segûo straordinari
E no inporta se no t'ê nasciûo
Sotta a-e seu pòrte
A Lanterna a te ilumina
Anche se a gh'à e luxe asmòrte
E se sente
Quande t'ê lontan da-a teu çitæ
I seu colori, i seu ödoî
T'arestan pe l'eternitæ
De vòtte coæ d'anâ lontan
Mi chi no ghe pòsso stâ
Me sento streito coscì tanto
Che me sento mâ
No ghe vaggo a ca
Chi son tutti vêgi e i zoêni van
A çercâ fortùnn-a a-o largo
Comme e nâve piggian o mâ
Ma inti caroggi, ti côri e ti scuggi
E rivee co-i seu schêuggi
I monti, i fòrti
Comme luxe inti mæ euggi
I raconti de mæ barba
E seie tutti arzilli
Che se va 'n pö de gòtti
Cantemmo i Trilli

Son stornelli de quelli in zeneize
Che te tîan sciù o cheu
Son stornelli de 'n zoêno de paize
No l'é solo tradiçion
Ma gh'é molto de ciù
Zena t'ê comme 'na sirena
Ch'a sciòrte da-o mâ
E s'asetta in sciâ rîva
Ti peu amâla
Ti peu òdiala
Ma a t'arestiâ
Senpre vixinn-a

Stöie de mainæ
De camalli e de dinæ
Gente partîa pe-o mâ
Ch'a no l'é ciù tornâ inderê
Gente ch'a vive lontan
E mi canto ancon ciù fòrte
Pe arivâ co-a voxe
A Câdezedda e a Carlofòrte
A reixe ch'a l'aresta
No ti peu tagiala
Sotta a scòrsa dûa
Te piaxe ricordala
Zena
A no va via
Se ti a lasci primma ò pöi
Te vegniâ a nostalgia
Ödô de baxeicò
De vin bon e de pigneu
Vegne famme se ripenso
A mæ nònna e a-i seu raieu
E i frisceu
Ödô de stochefìscio e bacalà
Òua pe stradda
A gente a mangia anche o kebab
Gh'é rumescio inti caroggi
Quande l'é de venerdì
Ti gîi sensa 'na meta a dôe ôe
De matin
Ti incontri quarchedun
Se beive ancon in pö
De vòtte t'eu dormî
Sciusciâ e sciorbî no se peu
Zena a no te lascia stâ
A te costrinze anche a pensâ
De vòtte ti te stuffi
E ti comensi a ratelâ
Ma lê a o sa in veitæ
Ch'a l'é a normalitæ
I zeneixi son boin
A lòâ e a mogognâ
Ma t'àn senpre òsciûo ben
Bonn-a ò catîva sòrte
Quande t'êi in desgraçia
E quande t'êi ancon ciù fòrte
Quande t'àn saluòu
Con grande sentimento
Ghe saiâ 'n perché
T'àn dedicòu Ma se ghe penso

Son stornelli de quelli in zeneize
Che te tîan sciù o cheu
Son stornelli de 'n zoêno de paize
No l'é solo tradiçion
Ma gh'é molto de ciù
Zena t'ê comme 'na sirena
Ch'a sciòrte da-o mâ
E s'asetta in sciâ rîva
Ti peu amâla
Ti peu òdiala
Ma a t'arestiâ
Senpre vixinn-a