A pianigà cussì se parlava (Poesia in dialetto veneto)

Giancarlo Tubioeo el xe ea nostra memoria.
El xe tuta 'na storia.
Quando te ve nea soa botega, te te senti e te ste a scoltare.
Ghe xe tanto da ricordare,
So serte robe anca da imparare.
Sentete qua, el te dise, che te conto.
Co sta pressa moeghe on ponto.
Giancarlo del caendario el ga comissia a contare.
'Ndemo par ordine, el dise, senò femo confusion,
Che qua ghe voe tanta concentrassion.
Gennaro: " el bonino bonano " gera roba da puteeti,
Che magari i ciapava anca scheeti
E i tornava casa contenti come oseeti.
I putei coreva, coreva, da magnare così e così, scuoea pocheta,
Però par fortuna soe, aria e libertà ghe ne gera tanta
E questa gera 'na roba santa.
I putei no i gheva corsi,corsini e corseti matina,
Mesogiorno e sera,
Ma corse soe are, corse pai campi da arare,
corse pa no ciapare in testa e savate de so mare.
I grandi, (soeo omini par carità,parchè e femene
E portava disgrassie a volontà),

I faseva " bon prinsipio e bona fine ".

E uno se domandava: " Se el primo de ano,
Par caso in leto aea matina
Me mama par prima vedevo,disgrassie par
Tuto l'ano me tegnevo?"
E femene, del tuto noeo saveva, ma dee volte
'na bea crose e gaveva.
I grandi, quando chi portava " bona fine e
bon prinsipio ",
E bevi sto vermutin, bevi graspeta o on goto de grinton,
Se soea strada de ritorno ghe gera 'na busa
granda, i faseva on rabalton.
Sopratuto par i tosi, dal pare dea morosa
Gera bona creansa 'ndare
E ea so bea figura fare, coea brillantina in
Testa, tirai a lucido,driti,
Per far da omini anca se se gera soeo tosatei.
El pare dea tosa i vardava co l'ocio da
Inquisission,
El se diseva: "Spero che sto toso nol
Sia on molton ".
Daea Befana, tuti i putei in leto presto
i dovea 'ndare,
Che magari nea calsa

(quea più bea,no giustà o sbregà)
Nose, mandarini e carbon dolse
(gran fortuna)
Aea matina dopo i poeva trovare.
Febraro: come sempre se pregava,
(gnente costava e mai se sbagliava)
San Biagio e e sette soree par el mal de goea.
Xe vero che come desso no ghe gera
I virus resistenti,
Ma gnanca tanti riscaldamenti.
Ghe gera,anca, ea festa dea Candeora
E batendo i denti,coi paetò veci, smarii
E roversai se cantava:
" Candeora, Candeora, noi d'inverno semo fora..."

I cantava e i sperava parchè,
Quando i fiori dei persegareti rivava,
E buganse via e 'ndava.
Co gera ea festa de san Valentin,pal
Mal de caduto bisognava pregare.
Quea si che gera 'na bruta gatta da peare.
Pai pori disgrassiai che gaveva el mal
De caduto,el mal da parto e anca
Qualche mania, ghe gera soeo el manicomio,
Fin chea morte no i portava via.
A Carnevae, tra strade piene de fango
E pissine, faseva schinchee i putei e e putee,
Col " speo " in man " mascareta e sissoeta "
i 'ndava a fare
E chelcossa de bon ghe rivava da magnare.
Anca el fumo, che dae cusine scure, fora
vegneva,de fritoe e gaeani el saveva.
Maria,che odore bon! Se te geri sensa
magnare,paea sfinission te fasevi on rabalton.
A Carnevae se 'ndava vestii coea giaca
Roversà,con tanti tochi de tutti i coeori xontà,
I omeni vestii da femene e e femene da omeni.
Vestiti comprare no ocoreva, ansi no se
podeva. Se 'ndava strafantai
E che ridere, quando in piassa se gera rivai.
Par tuti ghe gera on giosseto de vin,dee
volte anca par el puteo picinin;
On goto de grinton e pasiensa se
Poi te fasevi " din don ",
anca parchè el Veneto faseva vin bon
E chi che eo diseva i gaveva proprio rason."