Glenlogie

There were four and twenty nobles stood doon at the king's ha'
And bonnie Glenlogie was the flooer o' them a'
There were six and six nobles rode thro' Banchory fair
And bonnie Glenlogie was the flooer o' them there

There were nine and nine ladies sat doon in the king's ha'
Bonnie Jean o' Bethelnie was the flooer o' them a'
Doon cam Jeannie Gordon, she cam tripping doon the stairs
And she's chosen Glenlogie from a' that was there

Saying, "Glenlogie, Glenlogie gin ye brook sae kind
My love is laid upon you, now I've told ye my mind!"
He's turned aroond lightly like the Gordons does a'
Saying, "I'm sorry, Jeannie Gordon, but I'm promised awa'!"

She's ca'd tae her maidens for tae make her a bed
Wi' ribbons and napkins tae tie up her heed
Then up spake her faither, and a wise man was he
Saying, "I'll wed ye tae Dumfendrum, he's mair gowd than he!"

"Oh, haud your tongue faither for this maunna be
Gin I get me Glenlogie, o'er him will I dee!"
Then her faither's ain chaplain, he's a man o' great skill
He wrote a braw letter and indited it weel

Saying, "A pox on ye Logie, and sin' it is so
My lady's love's laid on ye, must she die in her woe?
A pox on ye Logie, and sin' it is time
My lady's love's laid on ye, must she die in her prime?"

When Glenlogie got the letter, him being amangst men
It's up spoke Glenlogie, "What does young woman mean?"
When first he read the letter, a light lauch gied he
But when he read ower it, oh a tear blint his e'e

Saying, "Gae saddle me the black horse, saddle me the broon
Bonnie Jeannie o Bethelnie will be deid e'er I win!"
But the horses werenae saddled nor led on the green
Till bonnie Glenlogie was twelve miles his line

It was pale and wan was she when Glenlogie cam in
But it's red and rosy grew she when she kent it was him
"Whaur lies your pain lady, does it lie in your side?
Whaur lies your pain lady, does it lie in your heid?"

"Oh, na, na Glenlogie - you're far frae the pairt
The pain I lie under, it lies in my heart!"
"Well, turn roond Jeannie Gordon, turn roon on your side!
And I'll play the bridegroom if ye'll play the bride!"

Now, Jeannie's gotten married, her tocher's been told
Bonnie Jean o Bethelnie was scarce sixteen years auld
Bethelnie, oh Bethelnie, ye shine whaur ye stand
And the heather bells aroon ye shine ower Fyvie's land

Bethelnie, oh Bethelnie, ye shine whaur ye stand
And the heather bells aroon ye shine ower Fyvie's land