Jalousi (Remastered)

A kam eej* det var mejje*, ja det var i goer
Kvåen sat søvsen på buere* i det saem.
Så saet vi os å o*, som vi åelti hår juer*
Å snakke eej imæel* lidt me' hinaen.
A fortaelt hva tjømaj* haj ha såe, a kam lieg hæen frå haem
Om hans søn, dar er elektriker æ stæ.
Kvåen hon snakke om æ leksikon, å vist mæ en reklaem
Såntj æ bette blå* som posti* hae hat me'.

A spuer så selvfølgelig om hva posti hels hae såe*
Ja, for haj væ åelti såntj en gue beskien*.
Å maj væ åelti noer mier, nær haj tår har frå
Om de ting dar såntj går for sæ har omkring.
Jo haj hae da fåt hans kaffe, ja det pler haj jaen å få*
Å så hae haj sat å snakke me' vor huej*.
Haj er såntj i skønne maej*, haj er næsten åelti glåe
Å så venlig å reæl i buej å gruej*.

Så sae vi lidt å snakke om, hvor skøen i post vi håer
Å om hvor gammel haj mon egnlig er?
Kvåen hon ment kun haj er tredive, å at a ku ha vaet hans far
Men a menner haj er fyrre heller mier.
"Jamen tenk på såntj æ dejlig kraftig hoer haj hår", såe kvåen
"Å hans tæjjer*, de lisse hvij som snej".
Så kam a te å sæej, at de vist nok er forlorne
... Hvaffor såe a egnlig det?

*) A kam eej = jeg kom ind
*) Mejje = middag
*) Buere = bordet
*) Så saet vi os å o = så satte vi os og åd
*) Juer = gjort
*) Eej imæel = ind imellem
*) Tjømaj = købmanden
*) Æ bette blå = et bette blad (magasin)
*) Posti = postbuddet
*) Hels hae såe = eller havde sagt
*) Haj væ åelti såntj en gue beskien = han ved altid sådan god besked
*) Det pler haj jaen å få = det plejer han gerne at få
*) Huej = hund
*) Maej = mand
*) Buej å gruej = bund og grund
*) Tæjjer = tænder