Heimat

HEIMAT

I dänke zrügg, und i bsinne mi, a die Zyt, wo n i no Chind bi gsy
Wo d Wält soooo gross isch gsy, un ig no soooo chly!
Won i ha Bisons gjagt uf der Prärie
Wo zwüsche beidne Wohnblöck isch gsy
Wo "Lassy", "Winnetou" und "Fury", weisch no, sy üsi Fründe gsy
D Anita isch mys Schätzi gsy, u drum isch d Bärble nydisch gsy
My Wäut isch denn no ganz gsy, ganz klar, i bi daheime gsy!

Heimat, Heimat, wo bisch du häre choo?
Heimat, Heimat, uuf u dervooo
Heimat, Heimat, es isch denn geng Früehlig gsy
Heimat, Heimat, ha tänkt, s duuri ewig so

Später de, verjagt us em Paradies
Hei mer Öpfel gfrässe bis zum Dünnschiss
Total bireweich symer denn gsy, aber stei-hert, geng derby
Glücklech symer scho lang nümme gsy, hei immer müesse "stoned" sy
Mit "Kiff" u mit chli "LSD©" hei mer kämpft für d Anarchie
Hei gfunge s syg e Schweinerei, u si uszoge dehei
Üs het's tünkt, di Wält syg chly
U mir syge derfür ganz gross derby!

Heimat, Heimat, was hei si mit dir gmacht?
Heimat, Heimat, zur Sou, mit ihrer Macht
Heimat, Heimat, e heisse Summer, isch es gsy
Heimat, Heimat, du bisch nümm umegsy!

U ei Nacht ga n i ga spaziere, alei eme Fluss entlang, bim Mondschyn
Und i louffe vorwärts, zimlech wyt, dür mängi Gass hallet my Schritt
U n i tröime so chli vor mi hi, tröime u merke's gar nid
Dass es Herbscht isch worde derby, i louffe wyter u cha's nid la sy
U plötzlech isch alles häll u klar, d Wäut isch gross u wunderbar
U d Wält bisch du, u d Wält bin ig
U plötzlech, bin i wider da, deheim

Heimat, Heimat, bisch ändlech umecho
Heimat, i mir inne, han i di mitgnoh
Heimat, Heimat, s geit nid ume ne Bitz Land
Heimat, Heimat, Septämber in Leningrad
Heimat, Heimat, i bi zimlech umecho
Heimat, Heimat, ha so mänge Wäg unger d Sohle gnoh
Heimat, Heimat, aber i allne Gasse hallet's glych
Heimat, Heimat, octobre à Paris
Heimat, Heimat, s geit vil wyter als bis zum Gartezuun
Heimat, Heimat, und es füllt vil meh als nume Ruum
Heimat, Heimat, eso weich, eso bequem
Heimat, Heimat, Novämber in Jerusalem
Heimat, Heimatland, nomal
Heimat, Heimat, itz begryff's doch ändlech mau
Es geit nid um d Dicki vo dym Portemonnaie
Es geit nid um weniger, u nid um meh
Es geit nid um d Farbe vo dyre Hut
Mängisch isch es lyslig u mängisch lut
Heimat, Heimat, genau di suechen ig
Heimat, Heimat, u derby stecksch du doch Zmitts i mir
Heimat, Heimat, mängisch bisch du wien es Lied,
Heimat, Heimat, u mängisch ghören i di nid