über D's Meer

Über d's Meer

E Träne louft mir über ds Gsicht u tropfet abe
Uf en Ölfilm im dräckige Meer, wo sech der grau Himel spieglet drinn
U der Rägebogefilm louft usenang
Un es Härz entsteit, us ere Träne, us mym Oug
I luege no däm Riseschiff nache
Wo sech e wyssi Schuumstrass im graue Meer macht
U ne Möwe flügt hinderdry u kreiset höch über däm Ysekahn
I schicke my Liebi mit, si söll se ihre ga nachetrage

Über ds Meer geit si furt vo mir
Über ds Meer, dervo, i cha nid mit, i blybe da

I gseh si no ar Reling stah, und e Träne gsehn i, i gloube dra
Us ihrem Oug, über di schöni Backe, knapp am Mu verby
Won i ersch no grad küsst ha
Gseh, wie sech die Träne vom Chini trennt
U wie si nach eme länge Flug, ir Gischt undergeit

I däm Meer bin i geng mit dir
I warten uf dys Widercho, o we du furt bisch, du bisch geng da

Und e Hafenarbeiter jagt mi wägg ire frömde Sprach
I säge: "Ja, ja, scho guet, scho rächt!"
Und i luege n es letschts Mal no däm chlyne Pünktli nache
Wo sech fies im Dunscht versteckt, bis er drinn verschmilzt
So wie üsi Träne n ir Unändlechkeit töif inenand verschlunge sy

I däm Meer, bisch du geng mit mir
I wär so gärn mit dir cho, und i rüefen es letschts Mau
"Bitte, blyb doch da"

I chehre zrügg i die verrückti Wält, alles springt u rennt dürenand
I weiss nümm bin ig im Film oder söll das d Würklechkeit sy?
U der Lärme fadet langsam uus und i ghören e sanfti Melodie

Es isch ihri Stimm u si summet lyslig
Es si nume n es paar Wort: "Jeg elsker dig" Si liebi mi

Über ds Meer isch si furt vo mir
Über ds Meer dervo, i cha nid mit i blybe da
I däm Meer bin i geng mit dir
Über ds Meer dervo, i cha nid mit i blybe da

Über ds Meer isch si furt vo mir
I wär so gärn mit dir cho, i rüefen es letschts Mal
Bitte blyb doch da
Über ds Meer isch si furt vo mir
Über ds Meer dervo, i cha nid mit i blybe daa
Über z'Meer