Die wo überläbt hei

Vor der Höli, zwüsche Feuse, uf vercholete Stämm u Escht
Hocke die, wo überläbt hei um nes Füür u hei es Fescht
Si sy bsoffe und si gröle, wär no suufe cha, suuft vieu
Us em Fass, wo eine gfunde het - jetz plötzlech si sy stiu

Un en Auti ohni Brüscht u Häng u Haar steyt uf redt
S'isch die einzig Gstaut, wo hie no nes ganzes Hirni het
Aune ang're het dä Chlapf d Bei, d Arme, d Büüch u ds Gsicht entsteut
Wär no Ohre het, lost, was die mit em Hirni jetz verzeut

Si redt vo guete, aute Zyte, vo de guete aute Zyte

Si verzeut, wie's früecher Tier u Waud u Fäuder heigi gha
Doch mit riesegrosse Betonpischte heig me nadisna
Aus kaput gmacht u mit Blächkabine sig me wie verrückt
Dert druf umegfahre, mängisch heigi's gchlepft u d Lüt verdrückt

U trotz Gift, Chemie, wo me i d Luft heig gla, da heig me no
Vor Sunne Liecht u Wermi, vo de Wueuche Wasser übercho
U me heig no chönne läbe, mängisch sig me glücklech gsy
Heig sech warm gä, heig sech gärn gha, doch das syg jetz aus verby
Verby die guete, aute Zyte, üser guete aute Zyte!

Paar grosse Herre, seit die Auti, heige hie bestimmt wie's louft
Die heige ds Land de Lüt ewäg gno und sogar d Lüt säuber gchouft
Und d Lüt heige sech la choufe, heige gschwige, aues gschlückt
Heige d Häng u d Chopf verchauft u bruni Zunge gha, sech bückt

Paar hei sech gwehrt, hei wöue, dass zum Bischpiu Technik aune nützt
Doch mit Hiuf vor Technik heig me die vor ihresglyche gschützt
Viu hei der Gring u Pfüscht nie bruucht
U darum het's ne haut ersch taget
Wo's Nacht isch worde um se um, wüeu's so nes A-Wärk het verjagt

U jetz isch Schluss gsy mit de Zyte, mit de guete aute Zyte!