Promis

Ich bi jo so en Typ, oder, wo nöd so gern a Promi-Aaläss goht
Ich sueche keini Fründe so im Show-Business, oder
Well es git wänig, wo mer sympathisch sind, also zum Biispiil de Gölä isch mer sympatisch
Ich bi jo au so meh de Büezer-Typ, eifach ohni Schaffe
Bi jo frühener au immer so breitbeinig, oder, so wie ne Cowboy eso dur t Stadt gloffe und so und
De hetts also scho chönne si, dass drü stämmigi Type, oder
Wos mi gseh hend t Strosesiite gwächslet hend
Zum mich abschloh

Nei, ich wär au no fasch z spoht cho, ich bi no at Tankstell, oder
Und bim Tanke hani echli pressant ka, oder, bi au no chli nervös gsi, weg hüt Zobig
Hani gjuflet und eso no chli denäbed gschüttet
Denn e Frau nebed dra so blöd gluegt, oder
"Jo, wenn er ned breiched, müend er halt bim Tanke absitze"
Nei, es git so blödi Lüüt, oder, da isch e so ne dummi Chue gsi
So e richtigi Stradivari under de Arschgiige
Es git würkli Lüüt, oder, wonich mi denn ami froge: Chammer eigentli bi Exit au anderi aamelde?

Nei, nei, es git würkli mängisch eso komischi Lüüt, oder, und
E Bekannti vo mir, da isch au ned so grad di hellscht, oder, isch intellektuell no e Jungfrau
Do hani die letzi troffe, de het si so beidi Ohre abbrennt ka
Also wie de Niki Lauda, aber eifach stereo, oder
Do hani gfrogt, was passiert seg, do het si gseit
Jo, si seg am Glätte gsi, oder, de hets Telefon glütet, de het si wölle abneh
De hani gseit: "Jo, guet, jo, isch tragisch, aber werum beidi Ohre?"
Hett si gseit: "Jo, ich ha no müesse de Ambulanz aalüüte"
Eso eini, wo wenn si lauft, oder, uf em Trottoir und
Voore e Bananeschale liit, oder, denkt si: "Oh nei, jetz keii de wider um"

Nur zum säge, vilicht het de eint oder anderi s Gfühl, ich hebi do uf em Noteständer de Text
Stimmt natürli ned, well ich cha natürli alls uswändig
Aber ich mues immer grad luege, ob is richtig uswändig gsunge ha
Und, nei, nei, da isch e Witz gsi, well t Wohret isch, oder
Ich mach jo sones Programm 100 oder 200 mol, oder
De nimm ich mir ami öppis zum Läse mit