Charakter

Ich chaufe mini Chleider am liebste z Paris oder z London
Do hets die schönste Brockehüüser
Ich luege jo ned eso uf Chleider, ich selber has jo au ned so gmerkt, oder
I has eigentli erst gmerkt, wos z Züri eine cho isch und gseit het: "Hey, wotsch en Stutz?"
Vor allem, oder, woni am See unde gsässe bi und zwoi Entli cho sind und mir Brot zuegrüert

Ich bi jo au de, wo immer s wüeschtiste Christbäumli chauft
Well ich weiss, wie da isch, ich bi i de Schuel im Turne au immer als letzte gwählt worde und
Ich wett aber au ned immer uf mini Schönheit reduziert werde
Nei, wenn t Lüüt mi gsähnd, oder, froged sie sich meistens: "Isch echt das alles echt oder het er irgendöppis gmacht?"
Klar hetter öppis gmacht: Graucht, gsoffe, gfrässe

Ich bi jo au meh so de Typ, oder, also Ornig isch mir scho sehr wichtig
Aber mer darf natürli ned pingelig si
Für mi gits es tüütlichs Zeiche, dass i mues ufruume, da isch denn, wenns WLAN-Signal nümme durechunt
Nei, würkli, ich gib es zue, i bi ned so kritikfähig
Mein, Fründe sind jo dezue do, dass eim mol au ganz ehrlich is Gsicht säged, wammer falsch macht und ich schätze da
Numme so gsehn ich, wer ich als Fründ cha striiche
Tönt zwar blöd, wemmers selber seit, aber ich bin e sehr en guete Mensch
Ich merks immer wieder, also i de Badi bin ich eine, ich chauf zum Bispiel eifach Chind vo wildfrömde Lüüt e Glace, eifach so, oder
Well de gönd t Wäspi zu dene

Mini Grossmueter het jo immer gseit: "Mer cha immer öppis lehre, mer mues nur gnueg dumm si"
Ich ha jetz aagfange Google durezlääse, well mit Wikipedia bini fertig
Mer merkt au, mis Selbstvertraue isch jo zimli gross, oder, also wenn ich a mir irgendeinisch a mir zwiifle
Denn denk ich zrug, dass i mol nüün Mönet ohni Suurstoff usghalte ha i miner Mueter in
Nei, würkli, also vor miner Geburt bin ich nüün Mönet i miner Mueter iigsperrt gsi
Aber min Vater het mi det scho zwoimol i de Wuche bsuecht